ទីម័រ៖ ប្រតិភូដង្ហែព្រះអគ្គិជ័យកីឡា និងភ្លើងគប់ នៃព្រឹត្តិការណ៍កីឡាស៊ីហ្គេម-អាស៊ានប៉ាហ្គេម ឆ្នាំ២០២៣ ដឹកនាំដោយរដ្ឋលេខាធិការក្រសួងទេសចរណ៍ និងជាបេសកជនពិសេស នៃគណៈកម្មាធិការជាតិ CAMSOC លោក ហោ សារុន បានធ្វើដំណើរដល់ទីក្រុង Dili ប្រទេសទីម័រខាងកើត ដោយសុវត្ថិភាពហើយ នៅព្រឹកថ្ងៃទី៣ ខែមេសានេះ។

ប្រតិភូកម្ពុជាបានទទួលបានការស្វាគមន៍យ៉ាងកក់ក្តៅពី ប្រធានគណៈកម្មាធិការជាតិអូឡាំពិកទីម័រខាងកើតលោក Francisco Kalbuadi Lay នៅអាកាសយានដ្ឋានអន្តរជាតិ នៃទីក្រុង Dili មុនប្រតិភូកម្ពុជា ចូលជួបសម្តែងការគួរសមជាមួយឯកឧត្តម Jose Ramos-Horta ប្រធានាធិបតីទីម័រខាងកើត នៅរសៀលថ្ងៃច័ន្ទដដែលនេះ។

ពិធីដង្ហែផ្លូវការព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម នឹងប្រព្រឹត្តទៅនាព្រឹកថ្ងៃទី៤ ខែមេសា ស្អែកនេះ ដោយមានមន្រ្តីជាន់ខ្ពស់ និងថ្នាក់ដឹកនាំជាច្រើនចូលរួម ក្នុងនោះក៏នឹងមានវត្តមានប្រធានាធិបតីទីម័រខាងកើតផងដែរ ។

គួរឱ្យដឹងដែរ ភ្លើងគប់កីឡាបានដង្ហែឆ្លងកាត់ពី ប្រទេសវៀតណាម ហ្វីលីពីន ឥណ្ឌូណេស៊ី ទីម័រខាងកើត ហើយនាស្អែកនេះនឹងដង្ហែក្នុងប្រទេសទីម័រខាងកើត បន្ទាប់មកនឹងបន្តដង្ហែទៅជុំវិញប្រទេសអាស៊ាន ព្រុយណេ សឹង្ហបុរី ថៃ មីយ៉ាន់ម៉ា និងឡាវ ហើយភ្លើងគប់នេះនឹងបន្តដង្ហែមកកម្ពុជាវិញនៅថ្ងៃទី២៧ ខែមេសា ឆ្នាំ២០២៣ ដោយដង្ហែជុំវិញបឹងទន្លេសាបមុនឡើងមកដល់ពហុកីឡដ្ឋានជាតិមរតកតេជោ នាថ្ងៃទី០៥ ខែឧសភា ឆ្នាំ២០២៣ ដែលជាថ្ងៃបើកការប្រកួតកីឡាស៊ីហ្គេម-ប៉ារ៉ាហ្គេម៕